Lev 1 | NdeIBE | STEP | UJehova wabiza uMosi wasekhuluma laye eseThenteni lokuHlanganela. Wathi kuye:

Leviticus 1

Umnikelo wokutshiswa

1 UJehova wabiza uMosi wasekhuluma laye eseThenteni lokuHlanganela. Wathi kuye:

2 “Khuluma labantu bako-Israyeli uthi kubo, ‘Nxa omunye wenu eletha umnikelo kuJehova, kalethe umnikelo wesifuyo esivela emhlambini wenkomo kumbe owezimvu.

3 “ ‘Nxa umnikelo ungowokutshiswa uvela emhlambini wezinkomo, kumele anikele ngesifuyo esiduna esingelasici. Kumele asilethe esangweni leThente lokuHlanganela ukwenzela ukuthi samukeleke kuJehova. 4 Kuzamele abeke isandla sakhe enhlokweni yomnikelo wokutshiswa, ngalokho uzakwamukelwa esikhundleni sakhe, uphendle indlela yokubuyisana. 5 Kuzamele ahlabe inkunzi encinyane phambi kukaJehova, ngemva kwalokho amadodana ka-Aroni, abaphristi bazaletha igazi alichele emaceleni wonke ealithare esangweni leThente lokuHlanganela.

6 Kuzamele ahlinze iguqa eliyinkunzi abesewusika umnikelo lowo ube ngamaqatha.

7 Amadodana ka-Aroni umphristi kumele abase umlilo e-alithareni abesebeka inkuni emlilweni.

8 Yikho-ke amadodana ka-Aroni, azahlanganisa inhloko lamahwahwa enkunini ezibhebha ealithareni.

9 Kuzamele agezise ezangaphakathi lemilenze ngamanzi, njalo umphristi kumele atshise konke e-alithareni. Lowo ngumnikelo wokutshiswa, umnikelo owenziwa ngomlilo, oloqhatshi olumnandi kuJehova.

10 “Nxa umnikelo ungowokutshiswa ovela emhlambini wezimvu kumbe imbuzi, kuzamele anikele ngesifuyo esiduna esingelasici.

11 Kuzamele asihlabele enyakatho ye-alithare phambi kukaJehova, njalo amadodana ka-Aroni, abaphristi bazachela igazi laso emaceleni wonke e-alithare. 12 Kuzamele isifuyo asisike sibe ngamaqatha, njalo umphristi uzawabeka kahle, kugoqela inhloko lamahwahwa, phezu kwenkuni eziyabe zibhebha e-alithareni.

13 Kuzamele agezise ezangaphakathi lemilenze ngamanzi, njalo umphristi uzaletha inyama yonke abeseyitshisela e-alithareni. Lowo ngumnikelo wokutshiswa, umnikelo owenziwa ngomlilo, uqhatshi olumnandi kuJehova.

14 “Nxa umnikelo kaJehova ungumnikelo wokutshiswa owenyoni, kumele anikele ngejuba kumbe umntanenkwilimba. 15 Umphristi uzakuletha e-alithareni akutshile intamo abesekutshisela e-alithareni igazi lakho livuzele eceleni. 16 Kuzamele akhuphe isidlelo lalokho okuphakathi kwaso asilahlele empumalanga yealithare lapho okulomlotha khona. 17 Kayidabule ivuleke ngempiko zayo kodwa angayehlukanisi, muva kwalokho umphristi uzayitshisela enkunini ezisemlilweni ose-alithareni. Ngumnikelo wokutshiswa, umnikelo owenziwa ngomlilo oloqhatshi olumnandi kuJehova.